Ez şahbanûya te
Û tu mîrzayê min
Li pişta kihêleke sipîçîl
Minê xeyalên xwe
Bi hêdîka
Bisparta ser navmila te
Di binê kofîya min de
Xêliya dendika hinarê
Wê wergirta
Ruyê minê bextewarî
Meyê rê û dirb
Gund û bajar
Axên mêrgên derizî
Pelên kesk ên qedîfeyî
Bêhna nêrgizan
Karxezalên bizdonek
Gurîna çiravên şeyda
Li pey xwe bihîşta
Em du rêwiyên kelecanî
Di bin heyva gerdûnê de
Biçûna û biçûna…
II
Ez şahbanûya te
Û tu mîrzayê min
Meyê kelehek bihonanda
Ji dîwarên hezkirinên xwe
Ber bi asûmanan ve
Û teyê stêrkek biqetanda
Ji porên şevê
Yadîgarî dilşadiya min bikira
Û minê çemek çêbikira
Ji lehiya eşqê ya ebedî
Biherikiya ser singê te yê aliyê çepê
III
Ez şahbanûya te
Û tu mîrzayê min
Meyê parzemîneke nû vedîta
Ji okyanusan wêdetir
Di nav çiyayên rêz bi rêz
Belek bi belek
Tu erdnîgariya hêstên min
Ez di wê erdnîgariyê de
Bibûma gulek
Li ber daristana dilê te
IV
Ez şahbanûya te
Û tu mîrzayê min
Meyê keştiyek çêbikira
Bi libên mircanan ve
Û em ê daketana
Nav xaleyên deryayê
Wê şewq veda
Bi çirûskên me
Rûyê pêlên zirav
Û meyê di bin tarîgewrê de
Ji sorahiya hêyvê re
Kilamên dildariyê
Bigota û bigota…
