Ey saqî, ji derdê hîcranê îro giryan im
Ji bihûşta yarê qewirîm nale nal im
Bi şeb û roz bixem û kulan im
Tasek ji şeraba efsûnî bide, ez bêmecal im
Ey saqî, dergeyê xerabatê mifte neke li min
Ji derba xala dîdara yarê perîşan im
Ji jehra her du marê afîtabê bêhal im
Ketim bextê te çareyek ji te dixwazim
Her du çawên te fitneyên axirzeman in
Di şebê reş tarî de wek şebçirax in
Can di qafesa bedenê de ji bo te esîr e
Ew awirên te her yek mîna şur û xencer in
Ey saqî, şeraba ji lêvê yarê bide me avdalan
Mutribê meyxanê ber bistirê bo çavxezalan
Perwane me digerim çar anasir û razan
Agir bedena yarê, ax sîng û ber e
Av lêv, hewa nefesa yar ê
Her çar anasir dibin yek li ser dîdar û xalan
Di her gavê de ez dibe şah, tu dibe mat
Ev çi listeke ve çi listikvana ez mam mat
Ji lêvê te zemzem û ava heyatê hat
Diniqûtî dile min, hîcran çû vuslat hat
Sîng û berê teyî nûranî
Ez qurbana wan lêv û vî zimanî
Şarab diherikê ji nav çem û kanî
Ey Pîr, de were serxweş nebe vî zemanî
Ey Dilo, ev çiye tu xêz dike resmê jinê tazî
Heyf nîne li ser wan helbestên kur û ji xwe razî?
Ey Mela, resm ji bo kesê amî û nezana ye
Helbest ji bo kesê rênas û hawas û zana ye
Ê nezan û kêmhiş li taziya jinê dikê seyran
Ê zana û têgihiştî li manaya helbestê dibê heyran
Derd û birinê ku van ereb û acem û tirkan vekirye
Sed lokman û hîpokrat û Ibnî Sîna nikarê derman bikê
Ne misk û enber ne jî ava heyatê dermanê me ye
Tenê qedehek ji destê yara xwinşêrin dermanê me ye
Ey dilber were carek pirske halê me
Bibîne bê ji bo eşqa te çibûye ji me
Dermanên Loqman û pifa Îsa çarê nadê me
Dojeh li me dibê bihuşt eger tu carek nezerkê li me
Ey Mela ev çi eşqa dilberaya ku kes jê têr nebûye
Bişev û roj li ser sîng û berê yarê bê tê bibejê qey nedîtiye
Çi cezbeye, ya ku hiş dibe, can dide ber talaniye
Ey Feqî, ew raz şaraba li meyxanêye ku eşq bi xwe ye
Sîng û berê te wek berfa li serê çiyayê Sipanê Xelatê spiye
Tahma lêvên te wek ava kaniyên welatê Serhedê xweş delal e
Qama te wek darên bifêkî ser ta piya şerava tiriyê Toreye
Çem û kanîyên welatê yarê ava heyatê ye
Li ba te ciwanî nabê pîr her dem diherike wek ava zelal e
dilazadart@gmail.com
Tîrmeh 2025