- Dojeh
Tarî, her der û her tişt tarî
Ez tiştekî nabînim, tenê tarî heye
Bêhna xwîna hişk difûrê
Gûm gûma agirê semawatê
Xezeba kû kesî nedîtî û nebînayî
Erd diqelişê, asîman diçirê
Berfeke sorxwîn, baraneke mirovkûj dibarê
Bêne bîra xwe, di demên qedîm de meranî li meydanê
Şûr û mertal, tîr û kevan govend digirtin
De şerê hebûn û nemanê de
Çi jin çi mêr kû şêr şêr bê
Xwîn didan di bazara ceng û dîlanê de
Xwîn diherîkî, ser li aliyekî, dest li aliyekî, dil li aliyekî
Daristan û deşt bi xwîne şîn dibûn
Bê av û tav, bê ked û dem
Dûvre ji çekan gûle bariyan
Dîsa xwîn, dîsa talan, dîsa kûştin û pevçûn
Dema ku birinê me, di hembeza sîng û berê yarê de cebirîn
Nevîyên Ehrîmana bomba barandin bi ser gûl û kûlilkan de
Xwîneke tarî herîkî li ser rûye zemînê
Zîndan, qafês, bîra bêbinî, laşê derbxwarî
Disa jî ji dest berneda doz û soz
Dozekê ji dojehê û sozeke ji agirê etûnê
Behna çeken kîmyevî zaroyên nixûriye malê dikûjê
Pîremêr û pîrejinê li ber dîwarê demê
Bûk û zavayê li govêndê
Xwîn, xwîn, her der xwîn
Tarî, tarî, her tişt tarî
- Araf
Ez kî me, tu kî yî
Ez li kuderê me, ev der kûdere
Mirî me an zindî me
Çûyîn çiye, hatin çiye
Yek mezine an dûdo
Çiya bilind e an deşt
Ronahî û tarîtî ji çiye
Bihar çima li pey zivistanê ye
Av ji asimana tê an ji zemîne
Çima çavên min girtîne
Dengê xezebê û dengê aramiye
Di mejîye min de dîlan digrin
Rastî û çewtî çiye
Ji milê çepê behna tarî, xwîn û dojehê
Ji mile rastê behna ronî, av û bihûştê tê
Lê çep çiyê rast çiye ez nizanim
- Bihûşt
Ronî, her tişt û her der ronî
Zaroyeke çavê xwe li dinye nû vekirî me
Ez dibin im, behn dikim, dibihîz im
Sirûşt ji xewekê kambax hişyar dibe
Ewrên li ser rojê yên nixûmandî vedikişin
Zîndan dibe gulistan,
Bihar bi keskesora rengvedidê
Sterka şivana geş dibe
Dayik dikenê, zaro dikenê,
Bûk û zava bihev şa dibin
Ji erdê azadî dipijiqê, ji asîman dadî dibarê
Alayek bilind dibe bi ber asîmanê bircan ve
Çiya xwe dixemlînin nazênîn,
Rûbar bêsînor diherikin, diçin ber bi deryayê ve
Heramzadeyên ku jiyan didizîn
Di gorîstanên mar û dûpişkan de xelata xwe digrin
Çend hezar sale kû li benda te bûm
Mizgîna xêrê, ahênga ster û heyvê
Dendika atomê, ronî û germa agir
Bi xêr hatî serkeftinên ku mirin têkbirine
Bi xêr hatî evîna ku ji bo te me can da
Êdî tu can bide, bedenên mirî zindî bike
Êdî zarokên pêşerojê dinav bexçê bihûştê de bijîn
Û li ber dengê dengbêjê kewê ribat
Bayekî ku can hembêz dike porê me miz dide
Beden şa dibe, can dilşa, hiş azad, dil aram
Ronî, ronî her der û her tişt ronî